A casa da terceira idade de Burela
acollerá o programa denominado Axilmente, que é un obradoiro de
ximnasia mental para que as persoas maiores de 65 anos melloren a súa
calidade de vida. Esta actividade, que é gratuíta, empezará o día 18
deste mes e rematará o 15 de maio. Desenvolverase os martes e xoves de
17 a 18:30 horas e o prazo de inscrición remata o vindeiro 14 de
febreiro.
A concelleira de Servizos Sociais e Sanidade, Diana Durán García,
explicou que é “un obradoiro de promoción da autonomía persoal, de
carácter gratuíto, baseado na estimulación cognitiva e na prevención da
dependencia, no que se pretenden traballar as variables que determinan o
envellecemento exitoso, de forma que incidindo nelas, as persoas
maiores adquiran as ferramentas necesarias para mellorar a súa calidade
de vida, ser autónomas nas actividades diarias e incorporar unha serie
de hábitos de autocoidado, tanto no ámbito sanitario como no cognitivo”.
Diana Durán engadiu que “este obradoiro de ximnasia mental busca o
tratamento da persoa maior como un todo no que se traballan as distintas
áreas que son necesarias para manterse autónomo/a o maior tempo posible
e diminuír os factores de risco de padecer certas enfermidades, sobre
todo, o alzheimer o outras doenzas neurodexenerativas”.
A edil rematou comentando que “a intervención con maiores convértese
non só nun obxectivo social, senón nunha inversión de futuro. O fin
último é previr a dependencia e afrontar o envellecemento dende unha
actitude positiva e aberta”.
A inscrición para participar debe realizarse na Casa do Concello
desde xa e ata o vindeiro 14 de febreiro en horario de 8:00 a 15:00
horas e os interesados teñen que presentar o DNI. Tamén poden facer
consultas sobre esta iniciativa chamando ao teléfono 982 58 06 09.
Gustariame saber quen imparte o obradoiro e si está dirixido a todo tipo de persoas maiores, incluídas aquelas con deterioro cognitivo ou outras patoloxías. Grazas.
ResponderEliminarAna
As persoas que sofren deterioro cognitivo, xa sexa a causa de alzheimer ou outras enfermidades neurodexenerativas, contan cun programa específico impartido no centro de dia de maiores. O Programa AxilMente caracterízase por ser de promoción da automía das persoas e de prevención da dependencia. Gracias polo teu interés
Eliminar