Un grupo de 14 inmigrantes, chegados
nos últimos meses a Burela, recibiron onte a mediodía os diplomas tras
asistir en decembro a un curso formativo de inserción social destinado a
estranxeiros. Son cidadáns procedentes de Cabo Verde, Nigeria, Senegal e
China.
Os diplomas fóronlles entregados polo Alcalde, José Mª González
Barcia, e pola Concelleira de Servizos Sociais, Diana Durán. O obxectivo
do curso, segundo explicou a edil popular, “foi facilitarlles a súa
chegada e a súa integración en Burela, explicámoslles os recursos
existentes nesta zona e recibiron información dos procesos migratorios e
dos países de procedencia de todos eles. Tamén lles contamos o
funcionamento dos servizos sociais municipais e as normas fundamentais
do estado español que lles afectan máis directamente coma os apartados
relativos aos dereitos e deberes dos cidadáns estranxeiros e a lingua”.
Diana Durán engadiu que “achegámolos ás responsabilidades parentais
que teñen aquí e ao sistema educativo, así coma aos recursos cos que
contan para buscar emprego e a todos os servizos que poden atopar en
Burela: o centro de saúde, os trámites que poden realizar desde o
Concello, onde están os centros de ensino, etc, etc… o que perseguimos é
normalizar a súa situación na nosa vila o máis axiña posible desde que
chegan a Burela”.
A Concelleira de Servizos Sociais subliñou que “o curso resultou moi
produtivo, todos os participantes se sentiron máis arroupados ao asistir
a esta cita e ao ver que dispoñen de moitos servizos aos que
dirixirse”.
Este curso é froito do traballo coordinado entre o departamento de Educación Familiar e o Programa de Atención ao Inmigrante, dependentes ámbolos dous da Concellería de Servizos Sociais, Muller, Igualdade e Sanidade do Concello de Burela.
No hay comentarios:
Publicar un comentario