O proxecto Educando en Familia,
dirixido a nenos e nenas con idades comprendidas entre os 0 e os 6 anos
acollerá esta semana varias festas de entroido, segundo ven de
anunciar a concelleira de Servizos Sociais, Diana Durán.
Educando en Familia, que veu darlle continuidade á Aula Junior, será
escenario de 4 festas, unha por cada grupo de idade. O entroido será o
protagonista o luns, 24 de febreiro, e o xoves, día 27, de 10:30 a 12:30
da mañá. E o martes 25 e tamén o xoves 27, de 16 a 18 horas.
Diana Durán aproveitou para lembrar que “Educando en Familia é un
programa de coeducación e igualdade e de formación de familias, onde a
súa presenza é vital para educar a nenas e nenos de cero a seis anos do
Concello de Burela, desenvolvendo as súas aptitudes, a súa aprendizaxe e
a confianza en si mesmas/os, realizando actividades adaptadas a cada
idade na que o obxectivo é difundir unha cultura da infancia e acompañar
á familia na aventura de medrar e no desafío de educar”.
Educando en Familia iniciou a súa andaina o pasado mes de xaneiro, dándolle
continuidade á Aula Junior, tras o descanso das vacacións de Nadal.
No hay comentarios:
Publicar un comentario