O alcalde, José González Barcia,
desprazouse este luns a Santiago de Compostela para manter unha xuntanza
coa conselleira de Traballo e Benestar, Beatriz Mato. Tragsa está a
elaborar o proxecto de construción da nova escola infantil do municipio
que se levantará no solar co que xa conta o Concello.
Este foi un dos
asuntos abordados ao igual que a posible ampliación do centro de día
para discapacitados intelectuais da Fundación Eu Son e a construción
dunha residencia para persoas con discapacidades intelectuais, un
proxecto de hai anos que o Concello pretende retomar agora. González
Barcia valorarou de xeito positivo a celeridade coa que foi recibido por
Beatriz Mato para falar de todos estes asuntos de sumo interese para
Burela e para o seus cidadáns.
O rexedor explicou que “un dos asuntos que estivo enriba da mesa é o
da nova escola infantil, que vai ter 41 prazas e o Concello de Burela
ten asinado un convenio coa Xunta de Galicia, como xa é sabido, para a
súa construción. En principio a día de hoxe e logo da aprobación
definitiva do plan xeral de ordenación municipal o Concello de Burela
conta cunha parcela, que xa está fixada no propio plan xeral para uso
dotacional exclusivo para unha nova escola infantil e os trámites para a
súa adquisición van comezar en breve”. González Barcia subliñou que “de
feito xa mantivemos conversas cos propietarios do solar e nestes
momentos, por encargo da Consellería de Traballo e Benestar, xa se está
elaborando o proxecto construtivo do que será a nova escola infantil
municipal do noso concello, que vai contar con 41 prazas e que, de non
haber ningún impedimento, vaise construír nun solar, que é solo
dotacional, situado na rúa Circunvalación e nas proximidades da vía de
Feve”.
Ampliación do centro de día da Fundación Eu Son
No encontro celebrado esta mañá en Compostela entre Beatriz Mato e José Mª González Barcia “outro asunto que estaba enriba da mesa é a posible ampliación do centro de día de discapacitados intelectuais da Fundación Eu Son, que ten uns locais cedidos polo Concello na rúa Suafonte. Precisamente nese mesmo baixo estaba instalado o centro de formación ocupacional para persoas desempregadas, que está agora ocupando os locais que o Concello ten nas inmediacións do parque de Tíjola. Polo tanto en Suafonte quedan locais libres”.
O rexedor burelés indicou que “a petición da propia Fundación Eu Son o
Concello está estudando a posibilidade de ampliar as instalacións do
centro de día para persoas con discapacidade intelectual. Pero nin a
fundación nin o Concello temos suficientes recursos económicos para
proceder a unha ampliación, que nosoutros en principio consideramos
positiva e polo tanto propúxoselle á conselleira ver as posibles vías de
colaboración entre a Consellería, por un lado, e o Concello e a
Fundación Eu Son, polo outro, para poder levar a cabo esa ampliación.
Non tería porque ocupar obrigatoriamente todos os locais que o centro de
formación ocupacional para desempregados ten deixado libres, pero que
evidentemente en caso de que se vexa que poden ser precisos optariamos
por ocupar os que sexan necesarios”.
González Barcia contou que “Beatriz Mato ve ben a ampliación do
centro de día para discapacitados intelectuais da Fundación Eu Son
porque entende que se está facendo unha labor moi interesante dende a
fundación e dende o propio Concello. De feito quedaron canles de
comunicación abertos entre os técnicos e os responsables políticos da
Consellería coa concelleira delegada de Servizos Sociais, Diana Durán,
para acabar de perfilar todas esas posibles vías de colaboración que se
abren entre a Xunta e o Concello de cara a unha posible ampliación deste
centro de día”.
Intención de retomar un antigo proxecto
Finalmente o alcalde burelés manifestou que “esta mañá analizamos un terceiro asunto, que no seu día xa se propuxera por parte do goberno do Partido Popular cando estivemos no Concello na nosa anterior etapa, que é a posible construción dunha residencia para persoas con discapacidade intelectual. Nese sentido somos plenamente conscientes de que a situación económica evidentemente é moi complicada e hoxe en día facer calquera investimento que teña seis cifras ou máis é difícil. Pero nós expuxémoslle a idea que xa tiña o goberno do PP no seu momento, mostrámoslle o proxecto que xa nosoutros redactáramos e comezáramos a tramitar coa Xunta e que despois os gobernos bipartitos, tanto da Xunta como do Concello, paralizaron”. Para José Mª González Barcia “aquí ocorre exactamente o mesmo que no caso da ampliación do centro de día para discapacitados: imos ver que capacidades reais hai de asumir esta obra e de establecer marcos de colaboración, porque aquí estamos falando dunha inversión de seis cifras ou incluso superior, que loxicamente na situación en que estamos entendemos que é sumamente complexo sacala adiante. Pero se non movemos os temas nunca sairán adiante”.
O rexedor engadiu que “sendo conscientes da dificultade económica e
tamén de que os asuntos hai que movelos no caso deste tema, que
nosoutros levábamos no noso programa electoral dentro do apartado de
servizos sociais, vamos empezar a movelo porque entendemos que é unha
idea que, coa súa complexidade, pode ser perfectamente factible. Pode
levar tempo sacalo adiante, pero exactamente igual que o logramos
noutras cuestións creo que esta hoxe bota de novo a andar. Nese sentido,
exactamente igual que no anterior, dende a Delegación Municipal de
Servizos Sociais vaise ter un contacto permanente coa Consellería de
Traballo para ver que fórmulas temos de establecer de cara a unha
colaboración para que isto empece a tomar corpo”.
Tanto o alcalde burelés coma a concelleira de Servizos Sociais, Diana
Durán, valoraron de xeito positivo a xuntanza mantida hoxe coa
conselleira de Traballo e Benestar, Beatriz Mato, e co xerente do
Consorcio Galego de Servizos de Igualdade e Benestar é Roberto
Rodríguez: “temos que agradecer a celeridade coa que a propia
conselleira nos ten recibido, porque a entrevista solicitouse a
principios da semana pasada, e agradecer tamén a receptividade e o grao
de compromiso establecido entre a conselleira e o seu departamento co
Concello de Burela”.