jueves, 19 de diciembre de 2013
A CASA DA CULTURA DE BURELA ACOLLERÁ UN CURSO DE RISOTERAPIA DENDE XANEIRO ATA MAIO DE 2014
O Concello de Burela organiza un CURSO DE RISOTERAPIA que se vai desenvolver dende xaneiro ata maio do
vindeiro ano 2014. Hai 20 prazas e a inscrición ábrese o día 23 deste
mes de decembro. A actividade levarase a cabo na aula de familia da Casa
da Cultura.
Os interesados en participar deben inscribirse na Casa do Concello en
horario de 7:45 a 15:15 horas. O prazo remata o 10 de xaneiro próximo. O
curso empezará o 16 de xaneiro, xoves, e desenvolverase de 20:30 a 22
horas.
É unha actividade que está organizada polo Centro de Información ás
Mulleres, dependente da Concellaría de Servizos Sociais, Muller,
Igualdade e Sanidade, coa colaboración do colectivo Mujeres en Igualdad
Burela.
A concelleira de Muller e Igualdade, Diana Durán, explicou que “dada a boa acollida que tivo a pasada edición deste curso e o interese amosado polas participantes decidiuse organizar de novo esta actividade”. E engadiu que “o equipo de goberno está moi satisfeito da demanda que teñen este tipo de iniciativas entre as veciñas e veciños de Burela, polo que temos previsto seguir traballando na mesma liña”.
A CASA DA CULTURA DE BURELA ACOLLEU O LUNS UN ESPECTÁCULO PARA PREVIR A VIOLENCIA DE XÉNERO ENTRE AS MOZAS E OS MOZOS
A Casa da Cultura de Burela
acolleu o pasado luns, 16 de decembro, ás 12:45 horas un espectáculo
titulado I´ll be watching you (Hei estar vixiándote), que ten
como obxectivo previr a violencia de xénero entre os rapaces e rapazas.
Forma parte dos actos organizados polo Concello en colaboración coa
Secretaría Xeral da Igualdade da Xunta de Galicia en conmemoración do
Día Internacional para a Eliminación da Violencia de Xénero.
A concelleira de Muller e Igualdade, Diana Durán, explicou que “é un
proxecto pedagóxico, teatral, lúdico e musical que analiza os roles de
xénero que transmiten as cancións de temática amorosa da música
comercial de consumo masivo. Os obxectivos son actuar na prevención da
violencia de xénero e promover o pensamento crítico entre os rapaces e
rapazas”.
Diana Durán anunciou que “está prevista a asistencia duns 200 alumnos e alumnas de 2º, 3º e 4º de ESO dos institutos de Burela”.
GONZÁLEZ BARCIA E DURÁN VISITARON O MERCADIÑO SOLIDARIO DE NADAL DAS ASOCIACIÓNS BURELESAS
O alcalde de Burela, José María González
Barcia, e a concelleira de Servicios Sociais, Diana Durán García,
visitaron oficialmente no mediodía do pasado sábado o Mercadiño Solidario de Nadal que
organizan na Praza de Abastos durante esta fin de semana as asociacións
do municipio.
O alcalde e a concelleira comprobaron o enorme traballo que están a
realizar as asociacións burelesas e agradeceron e recoñeceron a
dedicación e esforzo que fan. De feito, Diana Durán afirmou que “o
traballo que están realizando hai que resaltaloo e tamén agradecelo, sobre
de todo aqueles colectivos máis vinculados coas problemáticas sociais, e
que se están a implicar absolutamente para colaborar cos máis
necesitados”.
A concelleira de Servizos Sociais tamén asegurou que “a implicación
do equipo de goberno coas asociacións é total, e se non facemos máis é
porque non podemos: tanto é así que nos últimos dous anos impulsamos a
creación de colectivos que antes non existían, e colaboramos
decididamente con todas elas. Non hai semana na que non haxa, dun xeito
ou doutro, reunións e conversas con asociacións, porque cremos que
nestes momentos difíciles no eido económico a sociedade civil ten que
ter un papel determinante na sociedade”.
González Barcia e Durán García recorreron todos os postos. A
concelleira aproveitou para dicirlles aos colectivos que “este equipo de
goberno aposta polas asociacións: por iso recuperou as subvencións, por
iso as manterá para o vindeiro 2014, tal e como anunciou o alcalde onte
mesmo. E xa nos gustaría poder dar máis axudas: non é posible porque o
bipartito deixou ao Concello con moitas débedas que agora, en vez de
pagalas eles soliños que é o que tiñan que facer, estamos pagandoas
entre todos”.
Diana Durán engadiu que “as portas do Concello están aberta para
todos os colectivos, ao igual que a colaboración que podemos prestar, e
eles o saben perfectamente”.
RESUMO DO BEN QUE O PASARON AS PEQUENAS E PEQUENOS NO CONTACONTOS CONTRA A VIOLENCIA DE XÉNERO
Neste pequeno espazo podemos apreciar o ben que o pasaron as pequenas e pequenos (e aquelas persoas non tan pequenas) que participaron no CONTACONTOS POLA IGUALDADE: CONTOS VELLOS, NOVOS FINAIS, dentro da Programación das Actividades Contra a Violencia de Xénero, a cargo de CAXOTO CATIVO, e organizado pola Concellería de Servizos Sociais, Muller, Igualdade e Sanidade do Concello de Burela, a través do CIM (Centro de Información ás Mulleres).
miércoles, 11 de diciembre de 2013
O ALCALDE DE BURELA PARTICIPA HOXE NO ENCONTRO COA DELEGACIÓN CABOERDIANA
- O Fondo Galego de
Cooperación e Solidariedade organiza unha xuntanza na Fegamp con representantes
de trinta concellos da comunidade
- O presidente da
Asociación de Municipios do arquipélago, unha alcaldesa e un xornalista
percorren o país no marco da Irmandade Galicia-Cabo Verde
O Alcade de Burela, Chema Barcia, participa no día de hoxe en Santiago de
Compostela no encontro coa delegación caboverdiana que visitiou Burela o pasado luns e organizado polo "Fondo
Galego de Cooperación e Solidariedade", entidade da que é socio o Concello de Burela. Representantes duns trinta
municipios confirmaron a súa presenza na xuntanza, que dará comezo ás 12.30
horas na sede da "Federación Galega de Municipios e Provincias" (Fegamp), unha
vez rematada a recepción institucional e a rolda de prensa que comezarán ás
11.30 horas. O evento encádrase na Irmandade Galicia-Cabo Verde, que se
materializa ao longo desta semana coa visita da misión africana para
visibilizar os proxectos de desenvolvemento apoiados no arquipélago atlántico.
Poñer en valor
a cooperación realizada polas administracións locais e provinciais a través do
Fondo Galego durante os últimos once anos é o obxectivo do Encontro co
Municipalismo Galego ‘O municipalismo en Cabo Verde: realidade e desafíos’. Ao
tempo, porase de manifesto que a cooperación internacional abre tamén
oportunidades para a economía, a cultura, etc. nomeadamente nos países
lusófonos. Búscase asemade sensibilizar sobre as desigualdades entre o Norte e
do Sur, nun exercicio de transparencia e intercambio.
A comitiva
africana está encabezada por Manuel de Pina, presidente da Asociación Nacional
de Municipios Caboverdianos e alcalde da Ribeira Grande, localidade da que
maioritariamente procede a comunidade caboverdiana asentada na Mariña lucense.
A misión complétase con Rosa Lopes, presidenta da Cámara Municipal de Porto
Novo e única alcaldesa entre os 23 municipios de Cabo Verde, e Vlademiro
Almeida, redactor do xornal ‘Expresso das Ilhas’.
Tras o acto na
Fegamp, continuarán logo o seu percorrido cunha recepción na Dirección Xeral de
Relacións Exteriores e coa UE, ás 14.30 horas. Xa pola tarde, realizarán unha
visita institucional ao Concello de Cambre ás 17.30 horas, onde tamén coñecerán
o museo romano e a igrexa da vila. O xoves viaxarán ao Concello de Vigo e o
venres a Redondela e Allariz. Nos días anteriores xa pasaron polos concellos de
Burela e Oleiros e mais as deputacións de Lugo e A Coruña.
33 proxectos no arquipélago
O Fondo Galego iniciou
a cooperación bilateral coa Asociación Nacional de Municipios Caboverdianos no
ano 2002 e desde entón ten impulsado 33 proxectos de cooperación
internacional centrados en áreas como a
habitabilidade, o xénero, a saúde e a educación, principalmente nas illas de
Santiago, Santo Antão e Maio, mais tamén con presenza nas illas de Fogo, São
Vicente e Brava. Promovéronse asemade once asistencias técnicas vinculadas ao
programa de voluntariado internacional "Vacacións con Traballo", un seminario
sobre políticas de xénero, a realización de varios documentos audiovisuais e
distintas misións
político-institucionais tanto en
Cabo Verde como en Galicia.
O Fondo Galego
O Fondo Galego de Cooperación e
Solidariedade está integrado por 90 Concellos e as Deputacións da Coruña e Lugo,
que concentran a través desta rede os seus esforzos no eido da cooperación ao
desenvolvemento. Garántese deste xeito unha xestión profesional e transparente,
así como a realización de proxectos con impacto nos países do Sur e a
sensibilización da sociedade galega a prol da solidariedade internacional.
Desde a súa fundación en 1997, o Fondo Galego ten desenvolvido 142 proxectos en
25 países e promove numerosas actividades e materiais en relación aos
desequilibrios Norte-Sur.
BURELA, ESCENARIO O PASADO LUNS DE DIVERSOS ACTOS DA IRMANDADE GALICIA-CABO VERDE
Burela acolleu o pasado luns diversos actos
da Irmandade Galicia-Cabo Verde. O alcalde, José Mª González Barcia,
subliñou o significado que ten para o concello acoller esta celebración
“que recoñece o traballo feito tanto pola comunidade caboverdiana
asentada en Burela como pola acollida que este pobo lles deu a estes
inmigrantes”.
O rexedor explicou que “o luns tiveron lugar aquí, en Burela, distintos
actos que se enmarcan dentro das actividades de irmandade entre a
comunidade autónoma galega e a República de Cabo Verde. Para nosoutros é
moi significativo e ademais estamos orgullosos pola elección de Burela
como sede dos actos que hoxe se celebran na comunidade autónoma galega,
que se fan aquí, porque sen dúbida ningunha veñen a recoñecer o traballo
feito tanto pola comunidade caboverdiana asentada en Burela desde
mediados dos anos 70 do século pasado e que hoxe son a comunidade de
inmigrantes máis importante que temos e, por outra parte, a acollida que
o pobo de Burela lles deu a estes inmigrantes que hoxe forman parte moi
activa da nosa sociedade”.
Diana Durán, Concelleira de Servizos Sociais, Muller, Igualdade e Sanidade manifestou que “valoramos de forma importante a celebración destes
actos polo que teñen de continuación na sensibilización sobre o
cooperativismo e sobre o municipalismo. Aquí hai dous factores, por un
lado a colaboración entre países, entre pobos, entre sociedades de
distintas etnias. Nós si por algo nos caracterizamos é por que Burela
sempre acolleu cos brazos abertos a calquera persoa chegada doutras
terras. E no caso concreto da poboación de orixe caboverdiana eu creo
que é máis que patente a capacidade de integración que houbo entre as
dúas sociedades: a nosa e a caboverdiana. Por outro lado convén resaltar
tamén, dentro deste marco de actuación do que é o cooperativismo, a
capacidade que tivo Burela no seu momento de dar un paso máis cara a
diante no sentido de irmandarse con Cabo Verde á hora de poder
contribuír ao desenvolvemento daquel país, evidentemente dun xeito moi
humilde, e á hora tamén de integrar máis e mellor á poboación
caboverdiana aquí, en Burela”.
O alcalde de Burela considera que “non deberíamos pasar por alto a
presenza que a comunidade autónoma galega tivo en Cabo Verde hai
aproximadamente dous meses na celebración da feira pesqueira Expomar
alí, en Cabo Verde, que contou coa presenza do Secretario Xeral de
Pesca, Juan Maneiro, e da xerente da Fundación Expomar, Catalina Luengo,
en representación da propia fundación como exemplo da implicación da
Fundación Expomar e por extensión do Concello de Burela no
desenvolvemento da República de Cabo Verde”.
En referencia ao reforzo do municipalismo González Barcia indicou que
“hoxe contamos aquí con Rosa Lopes Rocha, que é a presidenta da Cámara
Municipal de Portonovo, na illa de San Antonio, e dáse a circunstancia
de que é a única muller alcaldesa que hai en Cabo Verde. Isto dálle máis
realce a este acto porque vén representar o apoio que damos desde a
comunidade autónoma galega á presenza da muller en postos de
responsabilidade política e doutra orde en calquera país. Temos tamén a
Manuel de Pina, que é o presidente da Asociación Nacional de Municipios
Caboverdianos e presidente da Cámara Municipal de Ribeira Grande de
Santiago, curiosamente a localidade do país de maior procedencia da
comunidade caboverdiana asentada en España”.
O rexedor engadiu que “para nosoutros é un motivo de satisfacción
poder contar con estes actos aquí, en Burela, e tamén hoxe mércores asistimos a un acto que se vai desenvolver en Santiago de
Compostela, en concreto na sede da Federación Galega de Municipios e
Provincias, precisamente cos representantes caboverdianos tamén estará
presente o Concello de Burela na miña persoa para contribuír neste
camiño dunha maior sensibilización en canto ao cooperativismo, á
solidariedade e tamén á relación entre responsables políticos de ámbito
municipal tanto dun país, Cabo Verde, como da nosa comunidade autónoma,
Galicia”.
Pola mañá houbo un contacontos intercultural na Casa da Cultura
destinado ao alumnado de 5º e 6º de primaria dos colexios municipais e
tamén unha visita institucional ao Concello por parte da delegación
caboverdiana que estes días está en Galicia. Esta tarde, ás 17:30 horas,
inaugurouse a exposición "Caboverdianos na Mariña" na Casa da Cultura.
Está organizada polo Concello de Burela e pola Asociación Cultural Tabanka. E ás 18:00 horas tivo lugar un encontro coa comunidade
caboverdiana na Casa do Concello. Alí estiveron tamén os grupos Batuko
Tabanka e Rabentola, quenes nos deleitaron con sendas batukadas, dando paso, a continuación a un intercambio de pareceres e opinións sobre a inmigración entre os distintos alcaldes e os veciños e veciñas de Burela de orixe caboverdiana.
jueves, 5 de diciembre de 2013
DIANA DURÁN INFORMA SOBRE A ACCIÓN FORMATIVA DE INSERCIÓN SOCIAL, DIRIXIDA A PERSOAS INMIGRANTES
O
"Programa Municipal de Atención a Inmigrantes", dependente da Concellería de
Servizos Sociais, Muller e Igualdade do Concello de Burela, está a organizar un
programa formativo de Inserción social no entorno de acollida, neste caso, no pobo de Burela.
A acción formativa está dirixida a
persoas inmigrantes e o seu obxectivo principal é dar a coñecer os recursos e servizos de
Burela a estranxeiros recén chegados, co fin de dar un coñecemento máis integral
e práctico para unha óptima integración social.
Esta
acción desenvolverase os días 9, 10, 11, 12 e 13 de decembro, en horario de 9:30 a 12:30 na Casa do Concello, e será a cargo da Educadora Familiar xunto á técnico responsable do Departamento de Inmigración.
BARCIA E DURÁN PARTICIPAN NA IRMANDADE CABO VERDE-GALICIA DO FONDO GALEGO DE COOPERACIÓN E SOLIDARIEDADE
O "Programa de
Atención a Inmigrantes" da Concellería de Servizos Sociais do Concello de Burela,
como socio do Fondo Galego de Cooperación e Solidariedade, vai participar a
semana do 9 ao 13 de decembro nos actos da Irmandade Galicia-Cabo Verde.
Debido ao grande
traballo realizado no ámbito da cooperación en Cabo Verde, máis de 15 anos, dous
membros dos municipios caboverdianos cos que se traballou veñen a Galicia para
fomentar e sensibilizar sobre o cooperativismo e o municipalismo. Concretamente o
grupo de persoas que veñen de Cabo Verde está formado por un alcalde, a única
alcaldesa do país e un xornalista:
-Manuel de Pina,
presidente da Asociación Nacional de municipios caboverdianos e presidente da
Cámara municipal de Ribeira Grande de Santiago, curiosamente a localidade do
país de maior procedencia da comunidade caboverdiana asentada en Burela.
-Rosa Lopes Rocha,
presidenta da Cámara municipal de Porto Novo, na illa de Santo Antao, polo
momento a única localidade caboverdina cunha muller alcaldesa, debido en grande
medida polo traballo do Fondo Galego
neste municipio sobre cuestións de igualdade de xénero.
-Vlademiro
Almeida Marçal, xornalista do Expresso das Ilhas é o encargado de conectar
Galicia e Cabo Verde durante a semana do 9 ao 13 de decembro.
Concretamente en
Burela esta delegación vai estar o día 9 de decembro e, durante todo este, terán lugar diferentes actos para distintos públicos, co fin de divulgar a importancia
desta visita. Os actos son os seguintes:
**12:30 h Contacontos titulado “Antía, Wamba e o regato
pequeno” da Tropa de Trapo. Contacontos intercultural organizado para o
alumnado de 5º e 6º de primaria dos colexios municipais e será representado na
Casa da Cultura.
**13:30 h Visita institucional e Rolda de prensa no
Concello de Burela. Recepción polo Sr. Alcalde do Concello de Burela e pola Concelleira de Servizos Sociais, Muller, Igualdade e Sanidade.
**17:30 h Inauguración da Exposición “Caboverdianos na
Mariña” na Casa da Cultura, organizada polo Concello de Burela e a Asociación
Batuko-Tabanka.
**18:00 h Encontro coa comunidade caboverdiana na Casa
do Concello, acompañando o encontro os grupos Batuko- Tabanka e Rabentola.
CONTOS VELLOS, NOVOS FINAIS. BURELA SEGUE COA PROGRAMACIÓN DAS ACTIVIDADES CONTRA A VIOLENCIA DE XÉNERO, NESTE CASO CO CONTACONTOS POLA IGUALDADE
Seguindo coa conmemoración do Día Internacional para a Eliminación
da Violencia contra as Mulleres (25 de novembro) este domingo, día 8 de
decembro, ás 17:30 horas na antiga Praza de Abastos de Burela terá
lugar o CONTACONTOS "CONTOS VELLOS, NOVOS FINAIS" a cargo de Caxoto
Contacontos.
Está dirixido a nenos/as de idades comprendidas entre os 4 e 9 anos.
ESPERÁMOSVOS!!
O CONCELLO DE BURELA FIXO ENTREGA DOS PREMIOS DO XII CERTAME DE CARTEIS DO DÍA DA SIDA
Ducias de persoas achegáronse o xoves pasado en
Burela á mesa informativa instalada nas inmediacións do Centro de Saúde
para conmemorar o Día Mundial da Sida, que se celebra o 1 de decembro.
A concelleira de Servizos Sociais e Sanidade, Diana Durán, dixo que
“con esta xornada lembramos como previr a enfermidade e se mostra o
apoio a aquelas persoas que xa a contraeron”.
Ás once e media da mañá
tivo lugar a entrega de premios do XII Certame de Carteis do Día Mundial
da Sida do Concello de Burela. Este ano recaeron en Antía Baño
Rodríguez e Saray Rozas Regal, do IES Perdouro, na categoría escolar; e
nas Asociacións A Mariña e na Fundación Eu Son de Burela en categoría
especial. Os agasallos foron entregados por Diana Durán e polo alcalde,
José Mª González Barcia.
A edil popular subliñou que “o principal obxectivo desta campaña é a
sensibilización da sociedade e o recordo de que a sida existe e está nas
mans de todas e todos tomar medidas de prevención para poder freala.
Durante toda a xornada informamos a todos aquelas persoas interesadas e
repartíronse folletos informativos, preservativos, lazos e calendarios
de peto co lema Previr a SIDA día a día”.
O CONCELLO DE BURELA DESTINA ESTE ANO 7.400 EUROS ÁS ENTIDADES ASOCIATIVAS DE CARÁCTER LOCAL
O alcalde, José Mª González Barcia, e a
concelleira de Servizos Sociais, Diana Durán, asinaron o pasado venres coas
entidades asociativas de carácter social os convenios das subvencións
que o Concello lles concedeu para este 2013. Trátase de 10 colectivos
que reciben un total de 7.400 euros.
A Asociación de Axuda ao Enfermo Mental da Mariña recibe 2.000 euros;
a Cáritas Parroquial foille concedida unha subvención de 1.000 euros; a
asociación Esperanza recibe 300 euros; Camiña outros 300 euros;
Mulleres en Igualdade 500 euros; a asociación de Amas de Casa conta
cunha subvención de 300 euros; 500 euros recibe a asociación Xuntanza; a
Confraría da Semana Santa conta con 1.500 euros; a asociación Vagalume
recibe unha subvención de 300 euros e 400 euros son pas os xubilados A
Moncloa.
O rexedor avanzou que “nos orzamentos do vindeiro ano consignaranse
partidas presupostarias para a concesión de subvencións nominativas,
aínda que polo momento non están fixadas as contías que se concederán
nin as asociacións que as recibirán”.
Tanto González Barcia como Diana Durán subliñaron “o compromiso do equipo de goberno coas asociacións de carácter social. Estaremos ao seu carón axudándolles na medida das nosas posibilidades”.
19 FAMILIAS DO CONCELLO DE BURELA CON ESCASOS RECURSOS BENEFICIÁRONSE DAS AXUDAS PARA A ADQUISICIÓN DE MATERIAL ESCOLAR
O Concello concede este ano 2.108,73 euros ás
19 familias que solicitaron axudas para a adquisición de material
escolar para o curso 2013/2014.
Segundo explica a concelleira de Servizos Sociais, Diana Durán,
“todas as solicitudes presentadas cumpren cos requisitos establecidos a
tal efecto. No Concello tiñamos unha partida de 4.900 euros para
facerlle fronte a este gasto, aínda que as axudas solicitadas e
concedidas ascenden a 2.108,73 euros”.
A edil popular sinala que “o importe máximo das axudas era de 75
euros para educación infantil e de 60 euros para primaria e ESO e
estaban destinadas a alumnos/as empadroados/as en Burela cursen ou non
os seus estudios no noso municipio. Debían pertencer ás familias con
menos poder adquisitivo de Burela”.
Diana Durán engade que “o fin último destas axudas é favorecer a
integración sociocultural e garantir as necesidades básicas destas
unidades familiares no eido da educación. Para este equipo de goberno é
unha prioridade o traballo coas familias”.
A concelleira de Servizos Sociais lembrou que “o Concello tamén
custea os comedores escolares e as actividades extraescolares polas
tardes para tentar facilitar a conciliación da vida laboral e familiar
no noso municipio. Xa podo adiantar que nos orzamentos do vindeiro ano,
que están en proceso de elaboración, haberá unha partida económica
destinada á adquisición de material escolar para as familias con menos
recursos”.
O alcalde, José Mª González Barcia, e Diana Durán reuníronse coas familias beneficiarias.
Etiquetas:
axudas sociais,
educación infantil,
educación primaria,
ESO,
Familia,
material escolar,
Servizos Sociais
miércoles, 27 de noviembre de 2013
BURELA CELEBRA MAÑÁ O DÍA MUNDIAL DA SIDA
DÍA
MUNDIAL DA SIDA
MESA INFORMATIVA E
PREMIOS DO XII CERTAME DE DEBUXO E PINTURA
O próximo xoves 28 de novembro instalarase nas inmediacións do Centro de Saúde unha mesa informativa para conmemorar que o día 1
de decembro, domingo, se celebra o Día Mundial da SIDA, unha xornada na que se
recorda como previr a enfermidade e se mostra o apoio a aquelas persoas que xa
a contraeron.
O mesmo xoves
farase a entrega de premios do XII
Certame de Carteis do Día Mundial da SIDA do Concello de Burela, que este
ano recaeron en: Antía Baño Rodríguez e Saray Rozas Regal, na
categoría escolar; e nas Asociacións A Mariña e na Fundación Eu Son
de Burela en Categoría Especial.
Procederase así mesmo, á pegada dos carteis
conmemorativos cos traballos das persoas e entidades premiadas. Os actos
principias terán lugar ás 11.30h,
aínda que a mesa informativa estará ao longo de toda a mañá.
O principal
obxectivo desta campaña é a sensibilización da sociedade e o recordo de que a
SIDA existe e está nas mans de todas e todos tomar medidas de prevención para
poder freala.
Informaremos a
todos aquelas persoas que estean interesadas e repartiranse folletos
informativos, preservativos, lazos e calendarios de peto co lema “Previr a SIDA
día a día”.
Diana Durán García,
Concelleira de Servizos
Sociais, Muller, Igualdade e Sanidade
SERVIZOS SOCIAIS E POLICÍA LOCAL AUNAN ESFORZOS PARA TRABALLAR COAS VÍTIMAS DE VIOLENCIA DE XÉNERO E DOMÉSTICA
No
día de onte, a Concelleira de Servizos Sociais, Muller, Igualdade e
Sanidade, Diana Durán, participou acompañada dun membro da Policía Local
de Burela, na xornada de "FORMACIÓN E ACTUALIZACIÓN SOBRE O SISTEMA DE
SEGUIMENTO INTEGRAL DOS CASOS DE VIOLENCIA DE XÉNERO", celebrada en Lugo e onde se reuniron
distintas persoas usuarias das Forzas e Corpos de Seguridade, de
Institucións Penitenciarias e do persoal da Administración de Xustiza
relacionada coa Violencia de Xénero.
A
ponencia foi a cargo de D. Miguel Izquierdo Colmenero, Xefe de
Proxectos Informáticos do Gabinete de Estudos de Seguridade Interior da
Secretaría de Estado de Seguridade, encargado da presentación e manexo da ferramenta informática á que se vai ter acceso en breves dende o Concello de Burela, entre outros, para manexo do responsable da Policía Local, en materia de violencia de xénero.
Esta actividade de formación está directamente relacionada coa adhesión por parte do Concello de Burela ao Protocolo de colaboración e coordinación entre as Forzas e Corpos de Seguridade do Estado e os Corpos de Policía Local para a Protección das Vítimas de Violencia Doméstica e de Xénero,
atendendo así á proposta realizada dende a Subdelegación do Goberno en
Lugo e converténdose nun dos primeiros concellos da comarca na súa
implantación.
A concelleira
de Servizos Sociais, Diana Durán, sinala que “a Administración Local como a
instancia máis próxima ao cidadán, configúrase coma un espazo privilexiado para
a intervención coas vítimas de violencia de xénero do termo municipal, de aí a importancia de contar con esta nova ferramenta de traballo".
O equipo de
goberno entende que “a adhesión feita no seu momento ao referido protocolo por parte do Concello de
Burela é moi positiva tanto para as vítimas de violencia de xénero xa que
incrementa a súa percepción de seguridade, como tamén polo feito de que as
autoridades locais, os distintos partidos políticos e a sociedade en xeral, se
impliquen en combater a inaceptable situación de permanente inseguridade que
sofren moitas mulleres”.
Diana Durán, responsable
dos Servizos Sociais en Burela sinala que “a colaboración entre as Forzas e
Corpos de Seguridade do Estado e os Corpos de Policía Local nesta materia
guíase, en todo caso, polos seguintes criterios:
1.Proporcionar ás vítimas unha
resposta policial da maior rapidez e eficacia nas situacións de risco.
2.Proporcionar unha resposta
policial da máxima sensibilidade, calidade e eficiencia na atención e
protección ás vítimas e evitar ás actuacións que supoñen un incremento da
vitimización, especialmente a duplicidade de intervencións.
3.Proporcionar á vítima información
clara e accesible sobre os dereitos recoñecidos na Lei Orgánica 1/2004 e dos
recursos existentes para a efectividade de tales dereitos no ámbito territorial
correspondente.
4.Facilitar a transmisión entre as
Forzas e Corpos de Seguridade e os órganos xudiciais de toda a información
relevante para a protección da vítima”.
Desde o equipo de goberno cren
firmemente que esta iniciativa “é necesaria no noso termo municipal para dar a máxima cobertura ás vítimas de violencia doméstica e de xénero”.
FOTO: D. Miguel Izquierdo
Colmenero (Xefe de Proxectos Informáticos do Gabintete de Estudios de
Seguridade Interior da Secretaría de Estado de Seguridade); D. Ramón Carballo (Subdelegado
do Goberno en Lugo: Dona Ana Belén Pacio (Xefa da Unidade Contra a Violencia De Xénero na Subdelegación de Goberno en Lugo).
"COA VIOLENCIA, CERO PACIENCIA" É O LEMA GAÑADOR DO III CONCURSO DE LEMAS
O salón de plenos Concello acolleu na tarde do luns 25 de Novembro os actos institucionais para conmemorar o Día Internacional para a Eliminación da Violencia Contra as Mulleres que estiveron presididos polo alcalde, José Mª González Barcia, e pola concelleira de Servizos Sociais, Muller e Igualdade, Diana Durán.
A avogada do CIM, Rocío Valle Fraga, foi a encargada de achegar ás
asistentes aos recursos locais de apoio á muller e contra a violencia de
xénero. Segundo explicou Diana Durán “moitas veces coñécense recursos
autonómicos e estatais e descoñécense os que están preto de nós, os que nos
abren as portas cando necesitamos axuda, que son os recursos da
administración local. De aí que entendemos que é sumamente importante
promocionar unha vez máis o Centro de Información ás Mulleres e saber
cal é o seu cometido e cómo nos pode axudar”.
A continuación, tivo lugar a entrega dos premios ás persoas gañadoras do VII
Concurso de Microrrelatos e do III Concurso de Lemas. Amara Chao Durán
foi a gañadora do concurso de microrrelatos na 1ª categoría, é dicir, a
de mozos e mozas de ata 18 anos e Lucía Díaz Pardiñas foi a gañadora na
2ª categoría, a de maiores de 18 anos. Os encargados de entregar os
premios foron respectivamente o rexedor e a Concelleira de Xuventude. O lema gañador da edición deste 2013 foi Coa
violencia, cero paciencia de Cristina Isabel García Pena. Neste caso o
premio foille entregado por Mary Fraga, presidenta de Mulleres en
Igualdade de Burela.
O alcalde, José Mª González Barcia, foi o encargado de dar lectura ao manifesto contra a violencia machista:
“Outro ano máis xuntámonos hoxe, 25 de Novembro, Día Internacional
para a Eliminación da Violencia de Xénero, para amosar a nosa máis
sincera repulsa contra calquer xeito de sometimento da muller, tanto
sexa psicolóxico como físico, tanto sexa na nosa vila como en calquera
outro lugar do mundo.
Non debemos, non podemos e non queremos empregar como válida a fórmula de que a violencia é tan antiga coma o ser humano.
Non debemos, non podemos e non queremos aceptar que a violencia contra as mulleres é un problema privado, que non debe sair de entre as paredes do fogar familiar.
Non debemos, non podemos e non queremos conformarnos cunha sociedade
patriarcal e machista que exerce a súa forza contra a muller en vez de
buscar o equilibrio da igualdade e a complementariedade do home e da
muller.
Por iso hoxe, día en que se fai unha especial lembranza deste
problema, temos que reflexionar sobre as causas e as consecuencias
destra gran lacra social, ante a que nos sentimos impotentes e ante a
que non reaccionamos con suficiente contundencia porque seguimos a
pensar que é un problema alleo a nós.
Pois NON, é unha problemática social e polo tanto de todas e todos e
aínda que non sexa doado, cada pasiño que deamos contra a violencia de
xénero, por moi insignificante que nos pareza, é un máis dos tantos que
ata agora se foron dando e que permiten ás mulleres ter dereitos noutros
tempos impensables, como pode ser o dereito ao voto, a ter unha conta
de aforros ao seu nome…
Un ano máis, esta data recórdanos o que queda por facer: seguir
traballando e aunar forzas, tanto nós como administración local como vós
como cidadanía, para denunciar e combater dende todos os eidos posibles
a violencia contra as mulleres, e como non, calquera outro tipo de
violencia, sexa a que sexa e veña de onde veña.
Unha clara imaxe de que debemos de facer que todos os días do ano
leven un anaco de 25 de Novembro é o dato que ven de publicar a
Secretaria Xeral da Igualdade: no primeiro semestre de 2013 en Galicia presentáronse 2.552 denuncias
por malos tratos e, no que vai de ano, os xulgados galegos comunicaron
un total de 884 medidas de protección, entre medidas cautelares, ordes
de protección e ordes de alonxamento.
Os cambios e avances no tratamento legal da violencia de xénero, os
recursos creados para atender as mulleres vítimas desta violencia, as
campañas de sensibilización e os pasos que se deron para avanzar na
consolidación dos dereitos das mulleres son necesarios para loitar
contra este fenómeno. Temos que construír, no día a día e entre todas e
todos, unha sociedade igualitaria onde o centro sexan as persoas, sen
distinción de sexo.
Todas e todos podemos facer algo contra a violencia que sofren as
mulleres. Por iso digamos ben alto, unha e mil veces, NINGUNHA MAÍS!”.
Ao remate do acto a concelleira de Igualdade e Muller agradeceu a
todas as entidades que participaron nas distintas actividades
organizadas para conmemorar este día e dixo que “mentras siga existindo
un só caso de violencia de xénero non viviremos nin disfrutaremos dunha
sociedade que poida vivir libre e en igualdade. Recordemos, pois, o
lema gañador deste ano Coa violencia, cero paciencia, para que ningunha
muller máis sexa vítima desta lacra”.
MUJERES EN IGUALDAD DE BURELA, COLABOROU NO DÍA INTERNACIONAL CONTRA A VIOLENCIA DE XÉNERO
Mujeres
en Igualdad Burela participou nos actos organizados polo Concello de
Burela cunha mesa informativa situada na porta principal da Casa do
Concello repartindo lazos morados, chapas conmemorativas e catálogos de
prevención de violencia de xénero, así coma información sobre cando
denunciar e ante que organismos.
Así mesmo, participaron novamente nos
actos organizados pola Concellería de Servizos Sociais, Muller, Igualdade e Sanidade que dirixe Diana Durán e que, entre outros, incluía unha conferencia impartida
por unha técnico do CENTRO DE INFORMACIÓN ÁS MULLERES baixo o título “MULLER, QUE É O CIM?”.
A
presidenta do colectivo, Mary Fraga, fai especial fincapé na prevención e
o asesoramento por parte de nais, pais, titores/as, profesores/as, etc. de cara á
educación das nenas e nenos dende idades moi temperás para previr condutas
violentas que se poidan desenvolver no futuro.
Suscribirse a:
Entradas (Atom)