O Salón de Plenos do Concello encheuse na
tarde de onte para escoitar unha charla sobre o alzheimer, que organizou o
departamento de Servizos Sociais.
O alcalde, José Mª González Barcia, dixo que “desde o Concello en
función das nosas posibilidades e responsabilidades o que tentamos é
achegarlle á cidadanía os problemas que sofre a sociedade e que lle
poden afectar a calquera persoa. Estamos diante dunha tipoloxía de
enfermidade propia do século XXI”.
O rexedor considera que “a nosa obriga é axudarlle á xente a ter
información sobre esta enfermidade e a que as persoas de apoio non teñan
baixóns anímicos, que poidan e saiban regular e combinar a súa vida coa
do doente. Os coidadores teñen que saber dosificar o esforzo que
realizan cos seus enfermos”.
González Barcia tivo palabras de agradecemento e recoñecemento para a
concelleira de Servizos Sociais, Diana Durán: “Desde o equipo de
goberno axudamos a poñer en marcha unha asociación de enfermos de
alzheimer e estámolos a apoiar en todo o que podemos. A nosa intención é
seguir colaborando con este colectivo e organizar máis actividades
destinadas ás persoas enfermas de alzheimer e aos seus coidadores para
que saiban levar da mellor forma posible unha situación que se sabe
cando comeza, pero non cando remata. Na Concellería de Servizos Sociais
levamos dous e medio traballando moito e así seguiremos”.
No hay comentarios:
Publicar un comentario