O Concello de Burela ofrece
información a todas as veciñas interesadas en acollerse ás subvencións
de Apoio ao Emprendemento Feminino, ofertadas a través do Programa EMEGA
2014, dependente da Secretaría Xeral da Igualdade da Xunta de Galicia.
Estas axudas van dirixidas a empresas ou proxectos empresariais
integrados por mulleres emprendedoras que teñan o seu domicilio fiscal
en Galicia e están divididas en cinco grandes liñas de apoio. A súa
solicitude poderá ser tramitada ata o vindeiro 12 de setembro, por vía
electrónica a través do formulario normalizado dispoñible no enderezo
electrónico da sede electrónica da Xunta de Galicia https://sede.xunta.es. Ademais poderán atopar toda a información que precisen no seguinte enlace:
As interesadas poden achegarse xa ás oficinas municipais dos Servizos
Sociais de Burela para solicitar información sobre os trámites a seguir
para a presentación da documentación requerida. A Concelleira de Servizos Sociais, Muller, Igualdade e Sanidade no Concello de Burela, Diana Durán,
lembrou que “estas axudas están actualmente en prazo de presentación de
solicitude e dende o Concello, prestamos axuda a todas as mulleres interesadas
para que se poidan informar sobre os trámites que teñen que levar a cabo
e a documentación que deben entregar”.
Dende o Concello explican que o
Plan EMEGA se divide en cinco liñas de actuación: a Liña Emprende, que
facilita axudas mediante primas para estimular a posta en marcha de
iniciativas empresariais por mulleres por conta allea ou propia; a Liña
Innova para promover avances referidos á competitividade empresarial; a
Liña Activa para a renovación, ampliación ou cambio de localización do
negocio; a Liña ITEF para fomentar a investigación tecnolóxica en
empresas dirixidas por mulleres; e a Liña Concilia para permitir a
correcta conciliación entre vida laboral e vida familiar.
O Plan EMEGA encádrase no marco do VI Plan Galego para a Igualdade
entre Mulleres e Homes – Estratexia 2013-2015, aprobado pola Xunta o 14
de febreiro de 2013. Con el preténdese estimular a actividade de
mulleres emprendedoras e materializar as súas ideas empresariais a
través dunha serie de axudas económicas.
No hay comentarios:
Publicar un comentario