A Concellería de Servizos Sociais de Burela estrea a exposición A
escola, Camiño de futuro. Na mostra poderase contemplar un conxunto de
32 cubos, elaborados a partir de materiais coma o cartón pluma, que
plasman diferentes proxectos educativos que se están a levar a cabo en
países de África, América do Sur, América Central e Asia. A exposición
poderá visitarse de maneira itinerante polos colexios e institutos de Burela.
A concelleira Diana Durán, recordou que “debido a temática desta
exposición quixemos implicar aos centros educativos do municipio, para
que lle sirva a todo o seu alumnado para aproveitar os recursos
educativos e fomentar vías de participación solidaria. Por tanto, dende o
Concello queremos agradecerlles a tódolos centros interesados nesta
iniciativa a súa implicación e colaboración con nós.”
A edil engadiu que “dende o Programa de Atención a inmigrantes da
Concellería de Servizos Sociais, Muller, Igualdade e Sanidade do
Concello de Burela, como socio do Fondo Galego de Cooperación e
Solidariedade e en colaboración coa ONG Educo, queremos apoiar a
iniciativa do Fondo Galego de divulgar e sensibilizar á poboación sobre a
realidade social do mundo que nos rodea. No mes de outubro celébrase en
moitos países europeos a Semana Contra a Pobreza, e aquí en Galicia,
grazas á axuda das ONG´s, podemos dar a coñecer distintas visións sobre o
desenvolvemento socioeconómico e a grande diversidade de situacións que
se dan no mundo actual. De aí, que hoxe poñamos en marcha esta
exposición que esperamos sexa un éxito nos centros educativos”.
No hay comentarios:
Publicar un comentario