O Concello
convoca o III Concurso de Lemas e a VII edición do Concurso de Microrrelatos.
Ambos certames realízanse con motivo da celebración o 25 de novembro do día
internacional para a eliminación da violencia contra as mulleres.
Segundo explica a
concelleira de Muller e Igualdade, Diana Durán, “o obxectivo do concurso de
lemas é transmitir a través de mensaxes curtas a importancia da educación en
igualdade e da necesidade da eliminación da violencia contra as mulleres”.
Poderán participar no III Concurso de Lemas todas as persoas empadroadas en
Burela, que poderán enviar ata un máximo de 5 lemas á seguinte dirección de
correo electrónico: cim@burela.org. No
asunto debe figurar o nome do certame, o seu nome completo, o seu número de
teléfono e tamén unha dirección de correo electrónico á que poida responder.
A edil popular
subliña que “o lema debe constar de sete palabras como máximo e debe ser o
suficientemente significativo e estar relacionado co tema proposto. Entre todos
os enviados escollerase un, que será o que distinga a celebración do día
internacional contra a violencia de xénero do vindeiro do 2014”.
O prazo de entrega
de lemas rematará o 15 de novembro. O xurado pode declarar deserto o concurso.
O lema gañador darase a coñecer nun acto público que terá lugar o 25 de
novembro na Casa do Concello.
No VII Concurso de
Microrrelatos poderán participar tamén todas as persoas empadroadas en Burela.
Establécense dúas categorías: menores de 18 anos e desa idade en diante. A
temática deberá axustarse á conmemoración do 25 de novembro. Diana Durán
indicou que “os traballos teñen que presentarse en folios tamaño A4, cunha
extensión máxima de media folla, con tipo de letra times new roman tamaño 12,
en lingua galega segundo a normativa vixente e, no caso de ser posible, en
soporte informático. Todos os traballos que se presenten serán inéditos e non
presentados en anteriores concursos. Os orixinais quedarán en poder do CIM do
Concello de Burela, que se reserva o dereito da súa publicación, exposición,
doazón ou calquera outro tratamento posterior, sempre sen ánimo de lucro”.
Un xurado composto
por persoas do mundo da cultura e das letras, do Concello e do CIM, decidirá
cales son os dous traballos gañadores. O premio consistirá nun agasallo
valorado en 75 euros para cada unha das categorías.
Os microrrelatos,
asinados cun pseudónimo, deberán entregarse antes do 15 de novembro no CIM de
Burela, na rúa Eijo Garay, 20. Deberán ir nun sobre ao que se adxuntará outro
pechado no que figurarán os datos da persoa autora do microrrelato.
Ao igual que co
concurso de lemas os premios daranse a coñecer no acto público que se celebrará
o 25 de novembro. Desde a Concellería de Muller e Igualdade lembran que “a
participación en ambos concursos supón a aceptación de todas as súas bases”.
No hay comentarios:
Publicar un comentario